【姐匙Talk】的骰妹為已婚大嚿飯生仔

【蘋果日報】近年「的骰妹」好似低調咗，接戲又少咗，前排拍咗套劇，到上年先出街，雖然收視唔錯，但話題又唔講佢，所以呢套劇對佢嚟講冇得益。不過的骰妹自從同三叔公個仔「大嚿飯」一齊之後，基本上有條大水喉射住，已經可以揀嘢做。
豪宅做獎勵
Jessie聽講的骰妹前年北上拍劇時，發現有咗大嚿飯骨肉，雖然對方有家室，但佢對的骰妹都幾好，畀佢留種，的骰妹拍完劇之後，就留低待產，免得返到香港俾人問邊個係經手人。的骰妹都算夠運一索得男，雖然大嚿飯同正室都有個仔，但多個仔都係好事，所以大嚿飯就送咗間豪宅做獎勵。
其實大嚿飯每個月都會畀生活費的骰妹，亦都提議過佢專心湊仔唔好再做嘢，而的骰妹本身都緊張小朋友，依家都會選擇性開工，不過成日推嘢做，經理人公司就唔多高興，最後佢就同公司講再見。
的骰妹嘅好姊妹有同佢傾過，覺得佢本身條件唔錯，冇必要做人二奶，要揀高大有錢嘅靚仔唔係問題，而且大嚿飯講明唔會離婚，佢只能做阿二，但的骰妹真係鍾意大嚿飯，就算無名份都唔介意。的骰妹嘅閨密覺得好姊妹太儍，因為大嚿飯每逢過節都要返屋企交人，所以遇到節日，的骰妹就會特別傷感，同搵閨密訴苦，但係對住大嚿飯就唔敢怨半句。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站