匯豐做善事 募捐新春食品

【明報專訊】啱啱過咗初七人日，小琴開始點算今年到幾多利市之餘，赫然發現屋企原來買咗好多賀年食品，到家都完全未開過，親朋戚友送嚟嘅餅乾、朱古力禮盒仲堆滿屋，正苦惱緊點樣處置啲食品，先唔會「無衣食」，醒起今年匯豐銀行繼續舉行新春募捐食物活動，可以做吓善事。

今年匯豐會喺旗下10間銀行設置食物捐獻站，除咗總行、中環、百德新街、北角、德輔道中、尖沙嘴、旺角、荃新天地、德福花園同沙田廣場分行都有。

只接受未拆封乾糧

話晒要專程拎住咁多嘢去捐，小琴當然要預先八吓乜嘢捐得，乜嘢唔捐得啦。原來佢哋只係會接受預先包裝、未拆封嘅乾糧，即係話白米、麵、罐頭、餅乾，甚至奶粉都無任歡迎。至於賀年食品，食用期不少於8星期嘅乾貨，都統統接受，不過，由於收集食品嘅銀行唔會有雪櫃，小琴屋企嗰啲開都未開過嘅真空包裝年糕，睇嚟唯有自己食埋佢喇！

匯豐公關話，收集番嚟嘅食物會經由聖雅各福群會「眾膳坊」，同理匯豐仁愛堂「仁間有愛」社區支援中心，轉贈畀有需要嘅市民，食物捐獻站開到情人節（2月14日）咋，要捐就要趁手。