人物專訪：無為而治廿多年施永青決定淡出中原

【蘋果日報】起初約施永青訪問，他是拒絕的，後來他WhatsApp回覆：「我已決定淡出，不再這麼高調地自以為是了。」事實上，去年底他已表達退隱的意向，兒子施俊嶸今年1月1日接任中原集團副主席，正式交棒。最終他選擇在七十大壽前接受這次訪問，因為題目叫「無為而治」，這套他在廿多年從廁板上悟出來的管理之道，令中原地產由十多間分行變成今日在中港兩地擁有2,500間分行、5.5萬員工的集團。
施永青與王文彥於1978年創立中原地產，初期由王文彥掌政，1990年代改由他掌政後，當時公司管理層就為女同事着裙或着褲而爭拗，明明經紀口水用於開單，卻為此荒謬事情浪費。有一次他去廁所閱讀《道德經》，「我坐在廁板上竟忽然開竅」，於是借此經實施一種與王文彥完全相反的管理，稱為「無為而治」。
「中原終完」是必然規律
這套管理可用八字真言概括：「上面無為，下面有為」，「即係話如果上面無為啲，下低想發圍嘅人就有多啲空間。我唔夠膽話無為而治下嘅機構比有為嘅強，但喺一間無為而治嘅公司入面做嘢會開心過喺一間老闆好有為嘅公司入面做嘢。」
但在中原地產工作的朋友說，施老闆有「三不原則」，包括不蝕錢、不輸行家、不反艇。不是說上面無為嗎？施永青回應：「唔係我定㗎，所有商業機構都唔可以蝕錢㗎啦！第二，你同行家競爭，唔可以輸俾行家，輸俾行家就將來淘汰出局囉！另外，我哋呢行係人嘅行業，已冇要求服眾，只係唔反艇咋嘛！佢低低哋躀一鋪，忍住先，都算數啦！平時睇你唔順眼，不過我喺呢度仲搵到食，咪唔反你艇住囉！」
他亦察覺無為而治下的中原（中國）面對嚴峻考驗，他坦言：「無為而治喺內地都work過一個時期，但係出咗啲好有為嘅競爭對手。」他口中的有為競爭對手就是鏈家，過去多年他多次提及這個勁敵，數年前中原地產重啟上市計劃正為此而來，惟最終與王文彥談不合攏，擱置上市計劃。
不過他表現得豁達地說：「中原地產喺大陸有北京種、上海種、深圳種，有啲強種有啲弱種，弱種就淘汰㗎啦！希望有啲死剩種囉。死剩種如果再演變繁殖，睇吓將來有無機會開枝散葉。原有啲種唔夠人勁㗎，老老實實會有啲被淘汰。（驚唔驚死剩種都死埋？）咁呢個世界死剩種都會死埋㗎喎！有無聽過我講，中原中原，終有一日會完，呢個係世界嘅必然規律。你一出世，命運就係死路一條。一個機構都會死，死得快定死得慢就睇佢自己一番修為。」
「過咗生日要問施俊嶸」
本月七十大壽後，施永青決定淡出，「呢行做咗40年，大概仲有十零廿年活，無問題啩！仲有咩可以做吓呢。瓣嘢做得太耐咪想做下其他嘢囉！我唔想地產方面太多，當然唔會啪掣咁，一啪停咗。無為而治嘅人係隨緣，等上天安排，就到就就，唔使某時某日即刻變晒，變臉咩！」
他已安排兒子施俊嶸負責中原集團，女兒施慧勤負責子公司業務，如利嘉閣，「過咗生日，啲人問我，我就會話你問吓施俊嶸啦！佢決定到咪佢決定囉！現時問我，我照答，遲下問我，我會耍下佢先，耍得甩就耍。如果有人話：『嘩！施生，你個仔好惡啃喎，咁樣決定都得嘅，你幫手睇睇啦！』我會話，好啊，睇睇啦！」
記者：陳家雄
長青網 - 一站式長者及護老者生活資訊網站