新聞類別
財經
詳情#
【明報專訊】一直醉心研究太極嘅美聯集團（1200）高級執行董事黃錦康，究竟功夫有幾耍家？只見佢同另一位較佢高大嘅同事切磋時，雖然初頭雙方勢均力敵，但黃錦康突然出招，即令對方彈開10呎遠。難得黃錦康仲可以將呢場切磋比喻埋樓市，話雖然樓價家似乎牛氣冲天，但稍一不慎，熊市隨時降臨。
小琴有幸噚日喺現場見識，黃錦康喺美聯傳媒春茗之上露兩手，公司同事知道佢要表演，仲要求記者朋友離佢最少3呎以外，並且由職員組成人牆，以免記者們畀佢嘅強勁掌風傷到，認真大陣仗。佢仲預言喺下星期四美聯喺會展搞嘅周年晚宴上，會有更厲害嘅招式出現，會展咁大地方，相信佢到時招式大啲都得！
身穿金黃色棉衲嘅黃錦康，仲自我比喻為小熊維尼，寓意熊市力量，而對手係頭戴牛頭嘅太極師弟，象徵為牛市力量。
自喻為維尼熊 熊市力量
黃錦康話，買家係牛市，賣方代表熊市，大部分時間牛熊平手，但今年就較為特別，因為內地周不時加息，而美國經濟復蘇緩慢，港府嘅樓市政策又可能頻頻出招，就算牛市當道，但兔年嘅不確定因素已經增加，牛市隨時被痛擊打殘。
比喻唔難明，大家最關心嘅當然係幾時牛市完畢啦！黃錦康就不忘話要高人先識睇，邊個高人？咪就係美聯金融總經理彭漢強囉，佢話彭漢強睇樓市睇咗咁耐，比普通人更早察覺市場轉變喎，成個太極表演好精彩，不過，呢吓硬銷就搞笑咗啲喎。
報料電郵﹕piano@mingpao.com
回應 (0)
