信和打造平民價度假酒店

【明報專訊】小琴去外國旅行，都好鍾意入住「古蹟酒店」，貪佢地充滿懷舊同殖民地風情，星洲嘅「Hotel Raffles」同「Hotel Fullerton」，都係小琴杯茶，但房價就真係不菲，所以通常住一晚感受一下就算。噚日小琴就聽聞，由信和參與活化、營運既大澳文物酒店（即係大澳舊警署活化計劃、信和係09年中標參與呢個計劃），將會打造成一間尋常百姓亦可負擔嘅精品式度假酒店。

小琴聽到呢個佳音，梗緊第一時間問問信和中人，但佢地就相當口密，死都唔肯講房間嘅具體房租，只係強調「房租絕對唔會貴到飛起，普通市民都可負擔。」

講開又講，大澳文物酒店既前身大澳警署，係1920年建成，建築外形洋溢一派英倫風格，被港府列為三級歷史建築物。話明係精品酒店，所以房間只得9間，聽講將來仲會有大澳史蹟展示、同生態旅行團等服務。