張秀賢：時間留給自己沉澱

【蘋果日報】【佔中九子案】「黑夜雖長，但總會迎來白晝」，佔中案審結當日，張秀賢與其餘八名被告在庭外會見傳媒時，說了這一句話。五年前雨傘運動期間，張秀賢為中大學生會會長，亦是學聯常委，畢業後，他轉向了政治及社會運動以外的生活，展開網購代理生意。在社運前線退下來後，張秀賢希望把更多時間留給自己沉澱及裝備，「好老土，但呢段時間覺得過好每一日真係好緊要」。
你覺得做緊啱嘅事點解要跪低？最壞結局都係入去坐監，呢啲係磨練嚟。
佔中案18天的審訊，控方在庭上播放大量當時佔領運動的片段，迫使張秀賢不得不重新面對這段曾經有意逃避的記憶，「呢幾年嚟都唔係好敢掂關於傘運嘅嘢，或者唔係好想觸碰，因為呢個係一個傷口」。張秀賢說，每年的9月28日，他都有點刻意逃避的心態，「我記得傘後第一年我係特登避開個集會，之後幾年有去過，但都唔係好頂得順，可能留10分鐘就走，我唔係好知道喺度紀念緊啲乜」。
傘運過後，伴隨而來是很多參與者有了「運動創傷」，張秀賢亦然，「一場咁大型嘅社會運動之後，換取唔到任何嘢，最開始嗰陣係最浪漫嘅日子，大家冇分歧，去到後尾出現分歧，再到埋後來幾年由公共差異轉變成為嘅仇恨，之後本土派嘅出現某程度就係當年拆大台嘅轉化」。
運動結束後，張秀賢繼續他的學業，大學最後一年被檢控「煽惑他人作出公眾妨擾」、「煽惑他人煽惑公眾妨擾」兩條罪名，「埋單」的日子到來，反而令他感到解脫，「其實一早預咗佢會告，我覺得佢一定會拉中我，只係睇幾時，檢控咗都好過頭上面永遠有把刀，唔知幾時劈落嚟」。被官司纏繞，生活無法如常，「但冇得跪低㗎嘛，你覺得自己做緊啱嘅事點解要跪低？最壞結局都係入去坐監，最壞都係咁咋嘛，呢啲係磨練嚟」。
因為自知無法如常地生活，無法尋找朝九晚五的工作，故畢業後便思考往後要走的道路，「其實搞運動嗰刻已經知會返唔到正常工，要諗有乜方法唔餓死」。現時，張秀賢主要做網購代理的生意，代理台灣農產品，「因為識一啲喺台灣搞農村運動嘅朋友，佢哋會出產農產品，又覺得有意義，所以就同佢哋傾合作」。
曾經站在大型社會運動的前線，現時他想轉變一下自己的角色，「其實企前台嘅人係咪你並唔重要，依家係想幫到啲想做嘢嘅人，同埋自己顧好自己，我覺得呢樣更加緊要」。
審訊過後，張秀賢表示坦然面對將會到來的刑責，「最壞都係坐監，都仲捱得住嘅」，在這之後，他希望能夠再好好裝備自己，「我發覺自己好多嘢都見識唔夠深同廣，想讀多啲書，有機會讀master、再出去外國見識，認識唔同地方同埋界別嘅人」，令人疲累的審訊暫告一段落，但對於判決，卻仍未知會令這宗官司糾纏多久，「如果判得輕，政府會上訴，如果判得太重，就到我哋上訴，可能要搞幾年，心情都冇乜太大起伏」。
笑言已準備好「入獄書單」，以度過在監獄難捱的日子，「都會想睇啲傳記先，好似甘地、馬丁路德金嗰啲，同埋台灣黨外運動嘅歷史，我諗頭兩個月睇呢類書會有助心靈穩定，因為自己好似經歷緊啲前人都經歷過嘅事，盡量令自己覺得有價值，有啲嘢改變唔到時，咪做個西西弗斯囉」。
裁決前一天，他再接受本報電話訪問，稱自己心情仍然坦然，希望把握時間完成手上的工作。
■記者李雨夢
長青網 - 一站式長者及護老者生活資訊網站