朱耀明：無悔走到光榮終點

【蘋果日報】等候總是最漫長，佔中九子案宣判在即，或面對最長七年刑期，75歲的「朱牧」朱耀明卻神情輕鬆，甫見面，忙不及向記者展示「一身戰衣」，包括沒鞋帶的鞋及橡筋褲頭「懶佬褲」：「如果立即還柙，叫你除皮帶，至少唔會甩褲先啦！」一陣朗笑，黑色的幽默卻笑中有淚，聽着有點心酸，畢竟這兩年，因公民抗命坐監的人很多，都是經驗之談。自言早有心理準備入獄，朱牧表示最不捨是家人，但會以平常心面對，又形容就算被判入獄，亦只會視作「光榮的終點」，無怨無悔。
上年9月，因為腹痛難止，朱牧進了兩次醫院。朱牧解釋，「好多年前駁過條大腸，可能係手術後遺症，不過從冇呢次痛得咁厲害，做咗好多檢查，因為可能坐監，確定有咩問題可以先處理咗佢……依家仍要睇痛症科，係大腸蠕動痛定係肌肉痛，呢啲都要再檢查確定」，等候上庭的日子調理好身體是當務之急。可幸住在教會宿舍的朱牧向來作息定時，雖每天仍得處理公務，但傍晚游泳45分鐘卻是風雨不改的多年習慣，還有的是爭取晚飯前和孫仔孫女玩。
這樣的天倫之樂彌足珍貴，「都有心理準備會坐監，梗係唔捨得，惟有呢段時間見多啲囉」，朱牧苦笑。傘運一役，「佔中三子」及六名學生和政治領袖被控煽惑公眾妨擾等罪，經18天審訊，法官今日裁決。朱牧形容，走上法庭是另一個重要戰場：「喺法庭嘅最後陳辭，鋪陳抗命原因，都係公民抗命嘅一部份。」佔中三子，由陳健民到戴耀廷，最後陳詞同樣觸動人心，朱牧笑謂文筆沒兩人好，盡力而為，希望走好抗命的最後一段路。
「有人話（雨傘運動）冇實際結果，但成個香港社會運動係轉變緊，愛與和平、非暴力抗爭呢種信念，基本上已深植人心。」
「由開始走向公民抗命，呢條路就係咁走，當初選擇喺禮拜堂、喺十字架之下宣佈，就係想表達以自我犧牲方式，希望有人願意透過失去自由爭取公義，激發香港人走出無奈、走出無力感」。只可惜，舉起黃傘，遍地開花，門還是被重重關上。「就如陳健民所說：對話之路已走盡，30幾年來我都相信循序漸進，但進了甚麼？只看到退，套用蔡子強說話，由有頭髮等到冇頭髮」。本港多場重要民主運動從不缺席，朱牧直言可做的已做，沒有後悔。
「公民抗命走到坐監，係最後嘅終點，亦係光榮嘅終點，講自我犧牲、講愛與和平，走這條路係必然」。這兩年，因公民抗命坐監的人很多，痛惜年輕人的朱牧自言是悲觀的樂觀者，縱然社會氣氛低沉，但他認為尚未絕望。「目前嘅環境係舉步維艱，但唔好認命，有人話（雨傘運動）冇實際結果，但成個香港社會運動係轉變緊，愛與和平、非暴力抗爭呢種信念，基本上已深植人心，係好艱難，但放棄就更冇希望。」
他說：「掌權嘅人想盡辦法剝奪你嘅自由和人權，易於統治，每一代為佢嘅權利和自由去爭取，最高法院法官都講，自由係永恒嘅警惕，好多時喺疏懶時就會被奪取咗，每個年代都有年代嘅問題，就要喺嗰個年代負起應有嘅責任，我哋呢代就係走進監獄。」
■記者呂麗嬋
長青網 - 一站式長者及護老者生活資訊網站