「勿以為捉晒公雞，晨曦就唔會來臨」

【蘋果日報】各被告昨面對判決前並無畏懼，更激勵香港人決不可灰心放棄。各人希望港人繼續抗爭，昨日的判決不是終點，而是另一個開始，又指爭取民主的道路雖漫長，「唔好以為捉晒啲公雞，晨曦就唔會來臨」，只要人心不死，民主的晨曦終露曙光。
陳淑莊哽咽：為我哋嘅家爭取
九名被告昨晨聽取判決前在法院外集會。除學聯前常任秘書鍾耀華表示無話要說，各人都輪流發言。最先發言的三子聲言絕不退縮，戴耀廷指：「今日無論結果係點樣，我相信同我一齊好多朋友，我哋會繼續堅持落去，爭取香港民主。」陳健民稱，判刑雖然將有深遠影響，「我仍然相信愛與和平嘅力量，我對於我做嘅事係無怨無悔」。朱耀明亦指：「無論結果點樣，唔應該灰心，唔應該放棄，希望屬於爭取嘅人。」
自言「眼淺」的立法會議員陳淑莊發言時一度哽咽，她指母親不會到庭旁聽，所以特意穿了和母親在日本旅行時一起購買的連身裙，「我媽咪係一個唔識政治嘅人，但係佢從來冇質疑我做嘅嘢」。她又寄望港人「為我哋嘅家」繼續爭取應得的權利。「生於斯，長於斯，能夠以唔同崗位為我嘅家服務，係我一生嘅榮幸，我所得到嘅，一生受用，我所失去嘅，不值一提。」
另一議員邵家臻亦一度哽咽，他忠告港人：「千祈唔好習慣黑暗，更加唔好因為習慣黑暗，為黑暗辯解，更加更加唔可以因為習慣黑暗而嘲笑追求光明嘅人。」他警告政府：「唔好諗住捉晒啲公雞，困住啲公雞，或者殺晒啲公雞，晨曦就唔會來臨，晨曦必定會來臨。」
學聯前常委張秀賢則坦然面對：「千祈唔好再話，我哋九個係代香港人坐監，或者代佔領者坐監，我哋行咗公民抗命呢一步，所有嘢都係自己決定，最緊要係自己承擔。」他呼籲港人不要因無力感放棄：「去繼續走我哋未行完嘅路，今日絕對唔係一個終點，今日係另一個起點。」又以國語向台灣人說：「以香港為例子，大家去抗爭，捍衞自己的價值，現在香港與台灣前路都艱難，一起努力走下去。」
社民連黃浩銘則提醒各人，內地有多名聲援傘運人士被監禁，「佢哋承受嘅係更加多，唔好以為我哋付出咗好多，我哋仲有漫漫長路，唔好因為九子嘅監禁失望同灰心，希望在於人民，改變始於抗爭」。民主黨李永達對未來仍有信心：「香港民主運動進行咗三四十年，我哋暫時未有成果，但我永遠相信總之香港人心不死，民主係會嚟到，我更加相信獨裁政權係唔可能千秋萬世。」
■記者麥志榮
長青網 - 一站式長者及護老者生活資訊網站