自首至今仍未被起訴　王惠芬：平常心面對

【蘋果日報】佔中九子被裁定煽惑他人公眾妨擾罪成，在佔領運動後期，除了九子外，亦有佔領運動參與者到警署自首，以及逾200人在金鐘清場當晚留守被捕。當日有份一同自首的教師吳美蘭、融樂會前總幹事王惠芬至今仍未被起訴，對於「未知的檢控」，兩人均表示不會擔心，但認為此舉是製造寒蟬效應，打壓香港的民主運動。
吳美蘭：夢想係要付出
融樂會前總幹事王惠芬當年一同到警署自首，對於未知的檢控表示不會擔心，「因為我被視為冇政治能量嘅人，但假如真係告，我會以平常心面對」。至於是次審判會否令日後更少人參與民主運動，王說：「當然會令一啲人擔心，但正如陳仲衡法官所講：任何人認為民主一日就會嚟到，就會好天真。所以我哋更加要堅持，面對威嚇和恐懼，先可以克服呢種由政府刻意造成嘅寒蟬效應。」她又指，和三子一起參與了「一場波瀾壯闊嘅民主運動」，對此感到很榮幸，並且無怨無悔。
教師吳美蘭同樣有到警署自首，她指「冇得擔心，當初參與得就唔會擔心，如果擔心都唔會參與啦」。對於是次審判或會製造寒蟬效應，令港人噤聲，吳指這是難以避免的事實，「佢依家陸續將啲人檢控，同埋最近23條（立法傳聞）、《逃犯條例》修訂嘅情況，都見到（噤聲）速度係明顯咁加快緊」。除了政治檢控的因素外，吳美蘭認為近年一些人認為民主運動效果不理想，因此心灰意冷，亦是另一個令更少人站出來的因素，「不過我唔會因為政權打壓而唔行出嚟，民主運動需要時間，可能好長遠，但所有夢想都係要付出」。
■記者李雨夢
長青網 - 一站式長者及護老者生活資訊網站