糖尿病上眼　邵家臻慶幸可保釋打針

【蘋果日報】被判罪成後有兩周保釋期，邵家臻最大收穫或是能趁被監禁前入院做手術打針，冀令因糖尿病上眼而視力模糊的右眼，能在入獄前稍稍重見光明。佔中案的擔子非常沉重，邵家臻憶述得知可保釋的當日，回家後即昏睡兩小時，而立法會保安一句「支持你」，以及建制派議員私下為他祈禱，令他感到無窮張力的社會仍有一份美好。
「其實我更加想反過來叫大家加油，請你哋要再加油，做埋我哋九個嗰份，繼續守住香港。」
2012年前已確診因遺傳而患有糖尿病的社福界立法會議員邵家臻，上月中因糖尿病上眼，被迫判刑前入院接受人生第一個手術。由於術後至少要每月在右眼眼白位置打針一次，邵家臻一直擔心，若佔中罪成即時被判入獄，便會失去再打針機會，怎料卻意外獲得兩周保釋期，令他能上周二在女友陪同下到醫院再做手術打第二針，邵家臻指：「（醫生話）如果第一針打完唔打第二針，就完全無效；所以呢一針好重要，今次有時間打到第二針，我好多謝上天嘅安排」。
據知他已經為一旦入獄後的健康問題張羅，包括購備日常需要的藥物等，至於可能需於5月打的第三針，暫未知如何安排。
邵家臻最擔心的一直是年邁母親的承受力，獲准保釋之後回到家中陪伴母親共晉晚餐：「食佢蒸嘅魚、食佢蒸嘅牛肉，飲佢煲嘅涼茶，亦都聽佢呻。」邵家臻坦言平時在街外飲茶談及佔中案時，母親表現頗為冷靜，「但喺屋企講嘅話，佢就呻得多啲，覺得（佢）好擔心，知道我好大機會入獄，但佢亦知我唔係因為做咗咩壞事入獄」。為了安撫母親的情緒，邵已準備炮製一場「愛．回家」的邊爐宴，邀約母親及家人，圍爐盡訴心中情。
面對判刑壓力，邵說非外人能想像，「好攰好攰，好似被好多石頭壓住」，雖然身心俱疲，但邵休息過後又作戰，罪成後翌日上午8時多已抵達立會出席會議，邵說：「雖然選我嘅人知我係以雨傘人身份參選，亦可能有（判監）呢一日，但呢一日真係來臨，令到我成個任期縮短咗年幾，我覺得我都係有啲虧欠嘅，我都想盡量做，所以第一樣嘢就係盡量做、盡量開會，盡量喺議會做到乜就做乜」。
保釋時邵感受良多，除有無數巿民打氣，亦有立會保安私下稱「支持你啊」，更有建制派議員為他禱告，並叫他「有嘢幫手可以話我知」，令他感到議會兩陣營角力之時，「人同人（之間）嘅看待、對待，亦都係存在嘅」。
而在審訊期，邵家臻從天主教榮休樞機陳日君身上亦感受到愛的力量：「樞機係有一種撫慰（人）嘅力量，同埋有一種引你眼淚出嚟嘅力量，佢一嚟到攬吓你、摸吓你塊面，我次次都俾佢搞到喊晒。」
問到對於為他「加油」的港人有何寄語時，天上突然下起驟雨，邵說：「其實我更加想反過來叫大家加油，因為我哋坐得入去（監獄），都冇乜嘢油值得再加，反而請你哋要再加油，做埋我哋九個嗰份，繼續守住香港。」
■記者林俊謙
長青網 - 一站式長者及護老者生活資訊網站