吳光正長子 石澳勇救阿婆

【明報專訊】近年啲「富二代」經常被批評淨係貪威識食、掛住追女明星等等，見報都係負面消息居多，搵單正面少少嘅都唔容易。不過凡事都有例外，小琴噚日就聽到一樁關於富豪第二代嘅好人好事。話說港台節目《晨光第一線》主持人曾智華透過大氣電波爆料，話佢喺大年初三目擊幾名後生仔喺石澳勇救一名遇溺阿婆，其中一位不是別人，正是九倉（0004）主席吳光正嘅大公子吳宗權是也！

根據曾智華嘅口供，大年初三朝早九點幾，佢喺石澳沙灘附近散步，突然聽到海中傳來嗌救命之聲，說時遲那時快，有幾個後生仔已經即刻跳入海救人，並合力將一名年約60開外嘅老婦救返上岸，待救傷車嚟到，班後生仔就一哄而散。

雖然幾位後生仔救人冇留名，但曾智華就覺得其中一位高大威猛嘅男士熟口熟面，返家搵吓資料，肯定嗰位猛男就係Douglas（吳宗權之洋名）。

救傷車到即閃 救人不留名

八卦嘅小琴當然第一時間搵九倉啲老友求證，九倉方面開頭都唔係好願意講呢單嘢，幾個鐘後再同小琴確認，話Douglas當日的確喺石澳海灘附近跑步，咁啱聽到有人叫救命，就同幾位路人齊齊「下海」救人。

近排港台個《窮富翁大作戰》節目，有批評話係有錢人做騷，小琴唔評論參加者心態係點，不過身為百仁基金副主席嘅Douglas今次勇救阿婆又唔留名，就一定唔係做騷。