金界大股東 27歲仔入局

【明報專訊】華資企業大部分都係家族式經營，喺柬埔寨經營賭場嘅金界控股（3918）亦唔例外，噚日宣布委任行政總裁兼大股東曾立強嘅仔Chen Yepern入局做執行董事，子承父業指日可待矣！

另一子辭任非執董

睇返金界嘅介紹，Chen Yepern喺2009年畢業於加州Cal State University–Northridge，取得財務學士學位，舊年就曾經喺Caesar's Palace實習，今次入局後每年會少少地收番廿萬董事袍金。

照咁睇，現年六十有四嘅曾立強似乎想鋪路交棒畀仔仔，不過，金界嘅通告同時宣布，曾立強嘅大仔、啱啱過咗而立之年嘅Chen Yiy Fon由於負責業務變更，已辭任公司非執行董事、薪酬委員會委員、提名委員會委員及反洗黑錢活動監督委員會委員職務，但又冇交代大公子日後負責乜嘢，就有啲耐人尋味嘞。近排咁興爭家產，希望金界今次嘅人事變動，同家產分配無關啦。