中銀銀彈吸大專生

【明報專訊】家啲大學生真係幸福，申請銀行服務隨時優惠一籮籮。好似中銀咁，最近就向就讀香港7間大學，同19間專上教育學院的學生招手，只要班學生響6月30日前去中銀開個「好自在」綜合帳戶，就可以有一堆優惠。

雖然佢哋話呢個計劃嘅目的係想畀啲學生體驗下咩叫「全方位綜合銀行服務」，不過小琴就覺得，佢哋開出來嘅著數似乎仲吸引。首先，開戶嗰個即有餐飲現金券、旅遊折扣、首3年帳戶服務月費豁免，仲可以有中銀萬事達鈦金卡港幣200蚊免找數簽帳額；然後，拉多一個同學去開戶，又有現金券送畀你；自己再開多個港幣或人民幣「零存整付」存款，或者去買份指定保險，又有現金券送。

益吓學生當然好，不過小琴覺得呢個推廣手法，同珠三角班廠商應對民工荒既方式好似，為了招募人手，廠商會同民工講：「來我間廠有獎金，帶多個同鄉來我間廠，再多一份獎金。」