匯控留喺倫敦搞全年業績會

【明報專訊】匯豐控股（0005）本月28日就公布去年業績，至於集團業務「西向東移」嘅策略，會否有變，備受關注。小琴近日就積極喺中環收風，睇吓匯豐今年業績發布會唔會繼續承襲原有做法，即係由主席及行政總裁，分別坐鎮總部倫敦和香港主持。到咗噚晚，匯豐終於揭盅，原來佢哋全部管理層都唔來香港，留晒喺倫敦……之不過，港產「獅王」擁躉唔使失望，到咗中期業績，全批管理層又會來香港。

匯豐業績發布會，今年改由集團主席范智廉、行政總裁歐智華及財務董事麥榮恩喺倫敦透過視像廣播主持，故翌日喺香港舉行嘅業績後記者會，則由匯豐亞太區行政總裁王冬勝及匯豐香港區總裁馬凱博主持。

匯豐發言人同小琴解釋，每次匯豐業績發布會，除咗吸引到本港同埋倫敦嘅記者踴躍出席之外，國際間嘅媒體其實亦好想參與其中，為咗滿足各方，所以決定採用視像廣播形式，屆時記者們可以透過電話會議向管理層作出提問。

視像廣播 讓國際媒體參與

今次全年業績發布，匯豐管理層將會齊集倫敦主持，相信一眾醒目嘅匯豐公關亦預計得到，香港傳媒或者會不滿匯豐「厚此薄彼」，又或者匯豐方面唔想因而引起外界對於歐智華係咪可能回流倫敦有過多揣測，故喺噚晚嘅通告中，匯豐就率先預告，今年8月公布中期業績時，集團管理層將會齊集香港主持視像廣播，即係話，香港嘅記者朋友想聽歐智華親身講解業務，要再等多半年啦。

報料電郵﹕piano@mingpao.com