亞視大股東繼續隱形

【明報專訊】花崗岩銷售商昌興（0803）嘅主席黃炳均，自從拍住王征做咗亞視大股東之後，行蹤一直好詭秘，咁啱噚日昌興舉行特別股東大會，小琴都去碰吓運氣，希望可以一睹黃炳均嘅廬山真面目，誰不知佢繼續隱形，小琴今次又白行一趟。

公關：我哋都好少見到佢

在場嘅公關話主席出咗埠，即使喺度亦都唔會回應私人投資嘅問題，只係會答番有關上市公司嘅問題。其實小琴今次唔係第一次「食檸檬」，喺9月份昌興舉行嘅周年股東大會上，公關都用同一理由打發記者。小琴問公關，主席係咪成日要出埠，點解次次都撞正股東大會？佢就話：「佢真係成日都飛㗎，我哋都好少見到佢。」

不過各大傳媒對於黃炳均嘅「風格」睇嚟都好了解，皆因今次來採訪嘅記者實在少得可憐，大家好似都預知咗黃主席會出埠。