新聞類別
財經
詳情#
【明報專訊】吸引唔少城中名人購買嘅長實（0001）何文田半山壹號及半山壹號2期富甲半山，其中名人業主包括舊年8月以約2200萬元，買入富甲半山一個中層面積2069方呎單位嘅中原老闆施永青嘅太座，施太最近就以月租約4.1萬元將單位租咗出去，折合呎租都只係約20元，較市場做開呎租約21至23元平咗約一成。如果計租金回報，亦都只係得2厘多啲。
聽聞呢次促成租約嘅代理係中原兄弟行利嘉閣，代理界就話呢個做法都啱嘅，個單位舊年係由中原一手促成，放租嘅事當然由細佬利嘉閣做番。
較市價低一成 回報僅2厘
聽講施太將單位放租時，不求收得好高嘅租金，而係最緊要唔好搞到層樓「殘晒」，所以租樓前一係要求唔好養寵物，二係唔好係普通公司客，聽聞最終係租咗畀個歐資銀行高層。
呢個盤之前都有名人收租，包括舊年底，中建企業許晉亨或有關人士持有嘅半山徑26號頂層複式，就以月租約13萬元租出，以面積3022方呎計算，呎租約43元，成為當時政府推出辣招後，九龍傳統豪宅區內最大宗租務成交個案。
至於喺上月農曆新年前，板長壽司老闆「Ricky San」鄭威濤以8500萬元買入嘅半山壹號半山徑9號頂層複式，亦聽聞稍後會作長線收租。
報料電郵﹕piano@mingpao.com
回應 (0)
