叁龍電子煙未銷港 免踩地雷

【明報專訊】電子煙唔係啲咩新鮮事物，幾年前當叁龍國際（0329）仲係叫「如烟」嘅時候，已試過呢樣號稱消除吸煙危險嘅「香煙」。不過，香港一直唔見有電子煙出售。叁龍執行董事程婉曼解釋，香港售賣電子煙嘅法例存在灰色地帶，寧願去美國賣電子煙好過。

無尼古丁算唔算煙草？

原來香港法例列明，售賣含有尼古丁嘅電子煙等同賣普通香煙，要受煙草條例監管，當然亦要交煙草稅。不過，法例冇講明不含尼古丁嘅電子煙，屬唔屬於香煙嘅一種，叁龍曾經向相關機構查詢亦不得要領，所以暫時唔會喺香港推售電子煙。程婉曼話，有啲電子煙公司喺美國就將電子煙應歸納為香煙定藥物打緊官司，相信當美國有裁決後，香港可以照跟，到時情况就會明朗得多。

叁龍舊年因獲周星馳「前度」于文鳳入股而聲名大噪，不過程婉曼話，于小姐冇乜過問公司事務，淨係睇吓報告就決定入股，成為大股東後亦冇打算加入董事局。程婉曼仲爆料話，公司舊年為咗慶祝攞到美國電子煙專利搞咗個派對，當時公司都有邀請于小姐，但佢唔肯出席。