中總邀日前首相福田康夫

【明報專訊】今年係辛亥革命一百周年，香港的社會團體將會有相關的慶祝活動，好似香港中華總商會咁，會長蔡冠深噚日就好開心咁透露，3月底中總響大會堂將舉辦一個孫中山先生文物展覽，而且邀請了日本前首相福田康夫來港作嘉賓，蔡會長仲話，福田康夫應該有九成來到。

小琴奇怪，孫中山同福田康夫好似風馬牛不相及，點解搵佢做嘉賓呢？蔡會長解釋，2008年5月國家主席胡錦濤訪問日本，時任日本首相的福田康夫響位於東京市的百年老店松本樓宴請胡錦濤。點解？因為松本樓同孫中山的淵源甚深。

福田宴胡總老店 與國父淵源深

小琴翻查資料睇返，松本樓經營者小坂文乃的曾外祖梅屋莊吉，原來係孫中山的朋友，梅屋莊吉響經濟上為孫中山的革命事業提供大量資金，孫中山同宋慶齡的婚禮也是在梅屋的宅邸舉行；孫中山也因梅屋莊吉的關係而成為松本樓常客，梅屋亦因此藏有不少孫中山的物品，而宋慶齡當年在梅屋家經常彈奏的鋼琴，家就陳列係松本樓。

講開又講，小琴絕對認同，辛亥革命一百周年係中國人一件大事，打破封建帝制點會唔係一件大事，好好地紀念實在有必要，之不過，小琴至今發現特區政府，好似唔係好賣力去搞紀念活動，反而民間組織就相對較活躍，看來政府都應該深思吓，點解會出現呢種「官冷民熱」嘅情况。

報料電郵﹕piano@mingpao.com