網民懷緬董伯 「真心為港人」

【明報專訊】財爺「筆直」（Budget）一出，全城怒吼，曾俊華固然被鬧到「仆直」，網上民怨沸騰之餘，不少網民重提前特首董伯伯，正所謂「十年河東十年河西」，2003年被謔稱為「老懵董」嘅董建華，今時今日唔再係戰靶，討論區有網民表示「想衷心同董伯伯講聲對不起」，仲獲得不少網民和議，睇嚟兩位曾生真係要認真面對民心背向呢個問題！

小琴噚日喺香港討論區，發現有網民表示想同董伯伯道歉，話「其實當年你已經做得好好，希望你生活愉快，身體健康」，此帖一出，不少網民跳出來向董伯認錯，話「家先知當年董伯伯係真心為香港人好」，又讚董伯至少有志向，唔似得家果兩位曾生淨係諗住打份工出份糧。

睇到呢度，小琴都要「告解」，想當年仲係少女嘅小琴都非常之唔喜歡董伯伯，直至社工何喜華早兩年爆料，話老董在任時曾經出力幫助一位喺內地被判死刑嘅港人，同屋企人見最後一面，小琴先知老董其實都有一副古道熱腸，對董伯伯即時改觀。不過好人從政唔一定有好成績，學其中一位網民話齋，「如果老曾知道啲人掛住老董，佢就知自己有幾失敗」，希望兩位曾生喺餘下任期努力做出一點成績來，方為王道。