3Q老總上周摸杯底

【明報專訊】近日微博流傳一張3Q和解相，係關於騰訊（0700）主席馬化騰同360董事長周鴻禕，上星期喺中國互聯網企業高峰會入面，同互聯網幾大巨頭一齊摸吓酒杯底，以為3Q從此握握手，殊不知原來3Q鬥氣依然。360前日連同一班內地土炮團購網公布合作，令到內地網民可以透過360平台，睇到內地逾200個團購網，實行以人海戰術，對付美國龍頭團購網以及騰訊呢對星級組合。

360與內地團購網公布合作

近排，騰訊與就快上市嘅Groupon，傳聞雙雙在內地拍住上搞團購網，不過盛傳是Groupon與騰訊合作的團購網站——「高朋」（gaopeng.com）在上周三突然存在不足24小時，又突然消失，所以傳出兩大巨頭合作或生變。無論如何，360同班團購網嘅巨頭已經準備好開戰，360副總裁齊向東喺記招上話，360有3億多用戶，奉行開放，願意同團購網分享流量，分明暗諷騰訊咩都搶住做。千橡網副總裁、糯米網CEO沈博陽話，「Groupon入華，我們應該保持冷靜。」另一聯盟，F團CEO林寧講「Groupon入華一定水土不服」，來勢洶洶，唔知道騰訊同Groupon最終會唔會合作迎戰呢？