港股百強榜 中移動居首

【明報專訊】愈來愈多內地人投資港股，騰訊網同華富財經合作設計咗一個「香港上市公司百強榜」，畀內地人多啲認識港股。首次公布嘅百強榜，榜首係中移動（0941）。中移動有咩本領成為榜首呢？

二至四位皆中資銀行

根據評審標準，市值佔45％、淨利佔35％、營業額、股本回報率及息率共佔20％。中移動除咗市值大，其他方面分數好高，所以成為榜首。第二至第四位就由中資銀行奪得，分別係中行（3988）、建行（0939）同工行（1398），中石油（0857）排第五。

騰訊證券頻道主編張軍話，好多內地人有興趣投資港股，因為A股自由買賣量少、A股市場有漲跌停板限制，相對來說港股較自由，所以騰訊網設有港股頻道。不過，佢話內地投資者對本港窩輪更有興趣，睇嚟遲啲要加多個窩輪榜至迎合到內地投資者需要。