鄭海泉缺席兩會罕有

【明報專訊】全國兩會咁大件事，好多政協、人大都會喺百忙之中抽空出席，噚日舉行嘅開幕會議，小琴亦有守候，匯控（0005）執行董事兼政協委員鄭海泉嘅出現，期望可以喺佢榮休執董前同佢見吓面，不過等極都無佢蹤影，原來佢今年竟然唔出席！

之前匯控業績兩會兩邊飛

鄭海泉上兩年都有出席一年一度嘅兩會會議，諗返2009年匯控先公布完供股抽水方案，鄭海泉喺咁重要嘅日子，都有抽空出席兩會，但佢又心繫匯控，專程喺兩會空檔時期，飛返香港向傳媒就供股解畫。

今年小琴喺北京守候多時，無見到鄭海泉嘅身影，可靠消息話原來佢今年唔出席呢！常客竟然缺席兩會，小琴梗係覺得好意外，因為好多大孖沙，點忙都會喺兩會出現，就係博可以見到總理溫家寶，同佢有直接嘅接觸機會。甚少缺席兩會嘅鄭海泉今年唔出席，難度暗示佢5月退任匯控執董外，嚟緊莫非有意退任政協呢？