復活節外遊隨時破紀錄

【明報專訊】財爺預算案，人人有錢收，大家茶餘飯後都講點使呢6000蚊。食餐飯、去旅行係港人熱門消費活動，加上臨近復活節，相信今年復活節嘅客流量有機會破紀錄。民航處長羅崇文噚日話，希望復活節航班升降量會破紀錄。

羅崇文：每日航班升降量料破千

佢話預期農曆新年時，每日最高峰會有1000班航機，最終未有達到，暫時最高紀錄仍然係舊年12月中，其中一日有973班航機。今年喺6000蚊派錢措施下，大家興致勃勃復活節外遊的話，真係有機會破紀錄。羅處長話未收到航空公司申請加班機，佢話即使破1000大關，佢哋仲應付得到，可以調動人手配合。依家機場每小時可以處理60班航機，到年尾會去到62班，2015年更會達到68班，即係每日可以處理1300至1400班機。

不過油價上升，即使市民成功喺今日凌晨，網上買到國泰平價機票，都要另外畀燃油附加價費。國泰行政總裁湯彥麟話估計唔到油價上升情况，會視乎情况調整燃油附加費。

報料電郵﹕piano@mingpao.com