新聞類別
財經
詳情#
【明報專訊】家陣每12個半（用全港人口計，唔係成年人口計）香港人，就有一個香港人係百萬富翁，大嗱嗱拎住一球港銀流動資金，唔係買股，就係放喺銀行，可惜放喺銀行1個月，都唔知有無100蚊利息，若要搵高息股又唔係話咁易，真係要金睛火眼睇清楚先好入市，好似安踏體育（2020）咁，就隨時搞出個大頭佛。
安踏體育噚日中午發出股東周年大會通函，希望邀請各位股東喺下個月11號出席股東大會，不過好衰唔衰，喺通告列明股息截止過戶嘅附註上面，突然話會派特股股息，即時令到小琴非常疑惑，事關安踏體育出業績時唔多覺有特別股息派，唔通小琴睇錯？
原來安踏體育所謂嘅派發特別股息，只係手民之誤，實情係只會維持0.25元嘅末期息，唔會有特別股息。
現價股息3.4厘 不遜大藍籌
安踏體育喺噚晚收市後，即刻出返嚟澄清，承認附註上面話有得派特別股息，只係排字上嘅無心之失，小琴睇返年報，原來安踏喺2009年時的確有派0.11元嘅特別股息，今次應該係負責文書嘅同事，用返舊年嘅通函樣本先會出事。
安踏噚日股價高開低收，埋單時逆市跌成3％，好彩股價早喺安踏出通函前已經跌咗落嚟，若果唔係一個唔覺意有投資者因為「特別股息」幾隻字，買咗安踏就有排煩！小琴計返條數，其實安踏舊年派息，已經比09年多出近30％，達到0.45元，以噚日收市價計都有成3.4厘吖，好過唔少大藍籌！
報料電郵﹕piano@mingpao.com
回應 (0)
