寶哥哥將榮升「寶爺爺」

【明報專訊】東亞銀行（0023）副行政總裁李民斌（Brian）上年8月先同新加坡籍嘅女朋友拉埋天窗，轉過頭就已經將為人父，而「寶哥哥」李國寶仲好快榮升做「寶爺爺」，今次仲要係第一次抱男孫，寶哥哥一定喜上眉梢呢，唔知到時，佢會唔會學老友「四叔」李兆基咁，向員工大派利市呢？

Brian第一次做爸爸，雖然BB仔未出世，但已經非常開心，睇佢春風滿面咁去開兩會會議就知道啦！佢仲強調，「係仔係女都開心，爸爸（李國寶）都好開心！」太太馮靈針參加除夕倒數時已經肚突突，當時大家問Brian嘅BB性別，佢都仲未肯講，噚日佢喺北京講吓東亞中國發展大計時，都順便講埋呢個大喜訊！Brian無透露預產期係幾時，但就話，仲話今個月都有機會喎！

Brian：預產期「快㗎喇」

小琴第一時間恭喜Brian之餘，當然亦戥寶爺爺高興啦！中國人社會傳宗接代咁緊要，家第一個男孫就快出嚟見爺爺，加上東亞上年業績創新高，家庭事業兩得意，相信寶哥哥發夢都會笑醒。

代表銀行界嘅寶爺爺，不嬲出席立法會會議都係「三點不露」，嚟緊有孫抱，唔知會唔會更晏出現，甚至退休專心抱孫過日晨呢？Brian話，未聽到爸爸話要退休，而佢自己亦無意從政，至於會否接寶爺爺立法會議員個位，更加係無諗過呢！

報料電郵﹕piano@mingpao.com