唐唐鄰居 變身環保屋

【明報專訊】大家有無諗過喺露台做運動之際，親眼見到政務司長唐英年坐喺花園飲紅酒，同大家講聲Hi！事緣唐唐嘅鄰居，剛向城規遞交一個重建申請，放棄九龍塘洋房一貫鞋盒或火柴盒式嘅設計，改為有相當多嘅露台做戶外活動，又自設污水處理循環系統，甚至加裝太陽電池板，設計完全係一間嶄新嘅環保屋，喺一眾九龍塘洋房中，明顯別樹一格。

位於九龍塘約道8號的業主香港緯豐地產董事長梁平，透過公司申請輕微放寬高限，以興建1幢4層（包括1層地庫）嘅大宅，該宅位於即係政府司長唐英年家族大宅嘅正對面，若獲批，將較唐唐家大宅高少少，未知唐唐會否向城規提交意見呢？

唐唐喺香港持有3個住宅，其中2個出租，就只有呢間約道7號屋用作自住。唐唐家於2002年中以接近摸底價、3600萬元購入呢幢約2、3層高的大宅，該宅市值已升至約2億元，真係厲害。該宅原本由唐英年與太太郭妤淺各佔一半股份的公司持有，近年唐重組股份，公司由唐太全權擁有。

棄「鞋盒概念」 待城規審批

能夠成為唐唐嘅鄰居，自屬非等閒之輩，剛向城規申請放寬高限的約道8號業主為廣東省茂名市政協常委梁平，梁亦係香港緯豐地產董事長，涉足廣東省及香港房地產生意，也是內地知名慈善企業家。梁於近一年透過黃金年華有限公司以1.9億元，每呎樓面地價3萬元購入該地，可建樓面6351方呎。

梁透過代表於申請書中表示，希望以較獨特、創新的設計，與鄰近低矮的樓宇相容，不再以「鞋盒概念」增大樓宇容間。該屋將採用梯級式階級設計以增加戶外活動的機會，並由於要加設污水處理循環系統及太陽能電池板，有需要加建一層地庫。城規暫訂4月15日審理這宗申請。

報料電郵﹕piano@mingpao.com