巴菲特與韋爾奇 喺蓋茨屋企 唔識熄電視

【明報專訊】話說上個decade科技泡沫好熾熱嘅時候，微軟主席蓋茨，邀請有經營之神稱號嘅前GE（通用電氣）首席執行長韋爾奇，同股神巴菲特造訪佢位於華盛頓州嘅「未來大宅」。蓋茨當年作為電腦界「潮人」，間屋當然唔失禮，周圍有屏幕唔在講，大部分電器嘅插座、開關都係隱藏式，用者只須佩帶一個別針，行到邊，屋內嘅音樂、燈光同冷氣就跟到去邊，簡直係劃時代嘅智能家居。

股神用裇衫遮住電視瞓覺

兩位神級人士喺「未來大宅」留宿咗一晚，翌日朝早韋爾奇同巴菲特互相問好，韋爾奇就話，瞓係瞓得唔錯，但瞓覺前為咗熄電視，搵來搵去都搵唔到個開關，唯有將個電視推埋一邊眼不見為淨！話口未完，巴菲特都話自己唔識得熄電視，最終諗到嘅解決辦法，就係搵件衫冚住部高科技電視！

通用亞洲區前高層出書爆料

小琴之所以聽到呢個咁有趣嘅故事，皆因前通用電氣家電公司亞太區總裁黃廣揚即將出書，書名係《GE真面目——揭開由「盛世」到「亂世」之謎》，聽個名就知有爆料feel，唔知書內其他內容又有冇以上呢個故仔咁「爆」呢？