中信泰富榮明杰 「減人工」疑雲

【明報專訊】小琴係一個發憤向上嘅打工仔，日日捱騾仔之餘，最大興趣係年年睇吓大公司董事嘅人工，希望自己有一日賺到呢班打工皇帝嘅一個零頭。之不過，噚日打開中信泰富（0267）最新嘅年報，嘩！做乜前任大老闆榮智健個仔榮明杰，減咗成四分一人工？

由榮智健一手創立嘅中信泰富炒燶外匯後差唔多兩年，業務都穩定番晒，舊年仲賺成89億，歷來第二高，但係睇清楚個董事酬金表，榮明杰舊年酬金934萬元，比起09年跌成25％，不過原來今年全部董事都冇「以股份為基礎的支付」嗰部分，即係唔係榮公子特別偷懶。

話說舊年賺嘅錢，好多係嚟自賣資產嘅特殊收入，而澳洲磁鐵礦項目延遲令鐵礦開採業務由盈轉虧，唔出option住都算合理嘅。主席常振明人工更得番338萬，幾乎跌咗六成添！睇嚟一班高層今年要努力喇。