高達BANDAI 億八殺入觀塘

【明報專訊】雖然日本核危機未解決，好多喺香港嘅日本人都無晒心機，之不過，小琴收到風，日本知名電玩商、風靡萬千「電車男」的高達模型生產商BANDAI（萬代），近日就買咗觀塘億京大廈28樓全層，斥資1.77億元，可算是97年以來，日資公司喺香港最大筆買樓的入市紀錄。

但係小琴一Check之後發現，BANDAI應該係日本地震海嘯前約一個星期前，便簽下上述買賣合約，睇嚟一直租用金鐘海富嘅BANDAI，早早有意進軍觀塘。

今次BANDAI買入嘅億京大廈28樓全層，面積為2.8萬平方呎，計落呎價都要6000幾蚊，該物業位於觀塘海濱道133號，係億京發展旗下物業。

小琴身邊好多男性朋友都好喜歡睇日本動畫，而BANDAI就係一間做模型公仔嘅生產商，喺日本已經有60年歷史，係做機動戰士高達嘅模型起家，去年嘅營業額有過千億日圓。BANDAI除咗生產好多男仔都鍾意嘅高達模型之外，仲有其他動漫角色嘅模型，包括海賊王、新世紀福音戰士等模型，好受時下「電車男」歡迎。

代理消息：用來做香港總部

今次BANDAI喺觀塘入市，據代理透露就係想將該物業作為該公司喺香港嘅總部，而小琴噚日6點鐘打去BANDAI位於金鐘嘅辦公室，接聽電話嘅職員就話公司管理層已經放咗工，亦都唔清楚公司係咪喺香港有乜拓展計劃。

BANDAI喺香港買入物業，究竟係嫌香港租金太貴覺得唔划算，還是喺香港有啲大計發展都未知，不過如果係後者嘅話，相信香港一眾「電車男」都會幾開心吓。

報料電郵﹕piano@mingpao.com