城規會關心九龍塘幼稚園

【明報專訊】九龍塘窩打老道以西（窩西）的花園洋房區，近年出現大量不同教派的廟宇、大量新開嘅時鐘酒店、又有骨灰龕、再加上愈來愈多嘅學校及幼稚園，又有電影工作室及無數的婚紗影樓，真係似商業區，多過似住宅區，而且每逢返學、放學時間，校巴加上的士長龍，真係塞車塞到飛起。

城規會噚日亦忍唔住要插手，發出一份規劃指引，指出要審慎評估新發展計劃，特別係幼稚園及幼兒中心所帶來的交通影響。

幼稚園太多 返放學時勁塞

小琴翻查，城規會為一個細區域發出指引，可以話係歷來首次！城規會指出，九龍塘窩西一帶，劃作低密度住宅發展，但在該區開辦的幼稚園等日益增加，令交通非常繁忙。該會指出，若果申請人希望增加獲批機會，必須能於校舍內提供足夠的上落車位，最好每4至6個班房，有約1個車位，以減少違例泊車。

歷來首次為細區發指引

有代理指出，窩打老道以東嘅樓價一直較窩西為高，近年差距有進一步擴大之勢。其實不少名人都喺窩西有大屋，包括政務司長唐唐、「發哥」周潤發，以及中原老闆施永青。其中施永青施他佛道大宅最近裝修完，外表好靚仔，但老施都有同小琴呻，話搭的士返屋企，都曾畀人問係唔係去時鐘酒店「偷食」，令佢啼笑皆非。