專注截聽專員 最透明變最秘密

【明報專訊】作為截聽專員，胡國興每年提交報告都對執法機構毫不留情，他指這班「大客仔」曾有「自己惡晒」的心態，不希望外人「叉隻腳埋嚟」，不過經過多年磨合，執法部門大都已明白他的要求，他亦將心比己，十分體諒前線人員非存心「搞鬼」，只是「太想捉賊」。

查訪警隊廉署 每次「流連」3日

胡官指由最需要透明度的選委會主席，過渡到所有事均要保密的截聽專員，「家乜都唔講得，我最秘密」，坦言與其性格不符。他指監管截聽工作以看文件為主，每一兩個月便會到執法機構如警隊、廉署或海關查訪，每次去3天，一直看幾小時文件，還要抽問細微地方、抽檢勾線或監察儀器，甚至檢查購買相關儀器的單據，借出借入記錄等。他直言查訪工作「好慘」，甚至「好唔想去但無法子」，因為文件要保密，不便帶回辦公室，整日在執法部門人員「監視」下查訪，非常不自在。

不過，胡官直言非常理解他們的心態：「佢哋惡慣，唔想人叉隻腳埋嚟，初期可能希望隱瞞，表面合作，但個心唔服氣。佢哋一係覺得自己係英雄，一係就好惡死，家有個人走去睇佢啲嘢，唔鍾意係人之常情。」他笑稱：「有次我同特首（曾蔭權）講，話得你一個管到佢（廉政公署），連特首都說笑指，佢哋連我都查呀！」至於警察，胡官形容「無咁惡」，多年前已進步不少。

「佢哋惡慣 唔想人叉隻腳埋嚟」

他認為現時執法部門已很合作：「大部份竊聽及監察都無出錯，只係佢哋自入學堂就學拉賊，多數係因為太想拉賊。事實上如果法官唔批，佢哋亦唔可能以身試法，冒自己坐監的危險去拉賊。因為佢哋係武夫出身，文件做得不夠完善，寫得唔好，講得唔準確啫。」