秦發盈利升2.5倍？ 一場誤會

【明報專訊】煤炭股秦發（0866）舊年盈利按年升1.9倍，殊不知噚日股價竟然一度大跌16%。有行家同小琴講，睇吓秦發之前份盈喜通告，就會明白點解（讀者可以睇睇附上嘅通告），盈喜明明話舊年盈利「會升不少於2.5倍」，家唔對板，所以咪慘跌囉。小琴即刻打畀秦發問過明白。秦發職員同小琴講，原來盈喜嘅意思係，秦發舊年的盈利會係09年嘅2.5倍，即係盈利按年增幅不少於1.5倍咁話，無問題呀！

相當於09年盈利2.5倍 即是升1.5倍

小琴於是又翻查秦發當時發出盈喜，驟眼睇都誤以為秦發係講盈利只少升2.5倍，睇清楚先發現通告意思，確實係正如職員所講，係預測盈利等於之前盈利的2.5倍，換言之，舊年盈利按年增幅將不少於1.5倍。結果秦發前日公布去年盈利升幅近2倍，當然無牴觸喇，但呢份通告嘅中文確實係寫得幾唔通順，好容易會引人誤會。如果投資者有睇開港交所網站嘅中文通告，都知道通告有幾難明白，若然大家未來又遇到類似嘅情况，可能要睇埋英文通告，對照一吓先得，否則自己蝕底。

其實唔少行家先前都已經中招，誤以為秦發嘅盈喜係指舊年盈利會升不少於2.5倍，甚至有網站噚日報道秦發去年盈利嘅升幅只有1.9倍，不符合盈喜入面所講嘅2.5倍增幅。結果，呢場美麗誤會，引起嘅代價都唔細，本來業續同預期相若嘅秦發，噚日開市之後即刻捱沽，中午休市之前，跌幅更加超過16%，去到尾市先至回一回氣，跌幅先減少至5.7%，收報4.76元。

報料電郵﹕piano@mingpao.com