新聞類別
財經
詳情#
【明報專訊】電視廣播（0511）新老闆陳國強入主，無綫新聞部隆重其事，噚日特別派出3名記者訪問佢，無綫記者面對新老闆，直截了當問打工仔最關心嘅問題，就係人工福利同公司人才流失嘅問題，陳老闆順水推舟，話自己唔參與日常運作工作，交畀總經理陳志雲作答。
陳國強、王雪紅同私募基金正式成為無綫大股東，王雪紅唔喺香港，私募基金只係參與股東之一，陳國強自然成為傳媒追訪對象。噚日好多電子傳媒喺陳國強擔任主席嘅德祥企業（0372）辦公室，守候呢位新電視大亨。到咗下晝4點，無綫總經理陳志雲、外事部總監曾醒明傍住陳國強會見傳媒。現場所見主要係電子傳媒，而無綫新聞部隆而重之，派出3位記者、兩支攝影隊訪問。3位記者中，其中一位代表明珠台，其餘兩位劉芷欣同謝凱瑩代表翡翠台。對住新老闆，無綫記者積極問到員工關心嘅問題，就係公司人才流失，新老闆有咩方法應對？會唔會加人工？陳老闆話要交畀陳志雲處理，自己同日常管理工作劃清界線。
員工流失 交畀陳志雲處理
陳老闆答咗幾條問題後離開，由陳志雲處理大局。電視廣播去年度業績創新高，加上新老闆入主，小琴問陳志雲集團會唔會派特別花紅、股票畀員工慶祝吓？陳志雲就話公司舊年已經按員工表現派花紅，花紅大約係月薪嘅0.75至1.25倍。陳總又話自己都係打工仔，好關心加人工問題，多謝傳媒問新老闆喎。
報料電郵﹕piano@mingpao.com
回應 (0)
