誠哥帶挈 星洲贏滬港

【明報專訊】內地大型國企、銀行近年排住隊上市，帶挈香港、上海同埋深圳近幾年雄霸新股集資額頭幾位，不過正所謂風水輪流轉，一直視香港為最大競爭對手嘅新加坡，喺超人李嘉誠隻和記港口信託「保送」下，今年首季新股集資額就升咗上第三名，排名高過滬港。紐約亦終於「發威」，今年首季重奪新股集資榜首位。

根據安永《2011第一季全球IPO最新報告》，誠哥旗下和黃（0013）分拆出嚟嘅和記港口信託集資55億美金，係今年第一季集資額最巨嘅IPO，而星洲首季總新股集資額都不過係56億銀，難怪市傳本港有財金官員因為痛失呢隻「金蛋」激到紮紮跳。新加坡交易所啱啱呢兩日「被知會」可能同澳洲交易所「結婚」唔成，呢個集資額季軍唔知可唔可以畀到佢哋少少安慰呢？

星新股集56億 和記港口佔55億

至於太平洋另一邊嘅紐約，今年首季新股集資額就有成138億美元，佔全球總額近三成，係08年以嚟首次摘冠。滬港失色，但深圳就打爭氣波，上季集資額112億美元，排全球第二。

安永大中華區戰略性高增長市場主管合伙人何兆烽話，私募股權支持企業嘅IPO活動增加，同埋美國經濟前景改善，都係做就紐約交易所重奪集資額一哥寶座嘅原因。不過，以區域計，中國大陸加埋香港今年首季有110宗IPO（佔全球IPO約38%），集資金額183億美元（佔全球集資總額的52%），仍然係傲視同儕喎！

報料電郵﹕piano@mingpao.com