中石化高層 豪飲拉菲捱轟

【明報專訊】內地富豪嘅消費愈來愈豪爽，好似買西裝咁，都要買英國皇室御用裁縫師嘅牌子，令喺內地專賣男裝嘅利邦（0891）好吃得開。不過，隨着內地富商愈來愈豪，小琴發現香港嘅仇富情緒有蔓延去內地嘅趨勢，近日中石化（0386）管理層，就因為買萬元一支嘅「拉菲」（Lafite）來豪飲，搞到內地民怨沸騰。

話說近日有內地網民喺天涯論壇發表一篇名為《中石化高層喝酒萬元一瓶，如此窮奢極慾，油價不漲才怪》嘅文章，令到唔少內地網民「眼火爆」。根據網上公布嘅多張發票複印件顯示，中石化廣東分公司買入嘅酒水大部分係「拉菲」等名貴紅酒及高價茅台酒，其中一瓶1996年嘅拉菲（750ml），就要過萬元人幣。另一張貴州茅台酒銷售有限公司所開的發票，就顯示中石化一次性購買近82萬元人民幣嘅茅台。

利邦老總：內地奢侈品勁賣

「天價酒單」曝光之後，網民紛紛發帖炮轟中石化，更諷刺話成品油價上漲係因為中石化紙醉金迷、極盡奢靡，將享樂嘅錢轉嫁畀消費者。

不過內地人富起來，奢侈品市場就絕對吃香，利邦董事總經理王日明接受美國CNBC訪問時就話，睇唔到內地奢侈品嘅增長在未來幾年會放慢，仲話雖然通脹嚴重，但有信心將成本上升轉嫁消費者，最緊要做好品質管理喎。

話時話，利邦代理的英國名牌西裝Gieves and Hawkes可說大有來頭，成立於1771年，是英國皇室御用裁縫師，皇室一切喜慶盛會，要著的西裝都由Gieves and Hawkes包辦，英女王伊利沙伯進行檢閱大典時所穿的軍服，便是由這家歷史240年的老店縫製。講開又講，擁有這個品牌的原來是本港另一家上市公司永泰地產（0369），利邦只是代理。利邦的主要市場是神州大地，有英國皇室裁縫撐腰，自然夠派頭啦。

報料電郵﹕piano@mingpao.com