金至尊黃金周生意料升四成

【明報專訊】香港資源（2882）旗下嘅金至尊，尖沙嘴總店趕及喺「五•一」黃金周前正式開幕。主席黃英豪預計新店開幕，可以帶旺今年黃金周嘅收入，較去年同期可以增加三四成。雖然金價愈升愈有，黃英豪就滋油淡定話唔擔心影響生意，佢用專家口脗話，家金價升幅仲未到臨界點（tipping point），相信內地同胞仍然會大手掃貨。

尖沙嘴新店 料月入過千萬

黃英豪話人民幣升值，加上內地人工升幅唔少，內地人仍然好有興趣嚟香港掃首飾，家有九成生意嚟自內地客人。金至尊新舖位於尖沙嘴，每月租金要168萬元，黃英豪話新舖開張咗十幾日，生意唔錯，預計每月平均收入過千萬元，租金絕對應付得嚟。海南島最近開設免稅區，開幕場面墟冚，黃英豪都話有興趣分一杯羹，入去免稅區開設分店，家先要研究配套。

噚日金至尊大日子，黃英豪嘅家人都齊齊支持，喺英國讀書嘅二仔黃宇德，都趁放假返嚟捧場。佢讀會計同財務，今年畢業，佢話暫時未有打算做珠寶生意，會喺外面打吓工吸收經驗。