星洲GDP今年料超香港

【明報專訊】新加坡一直係香港發展國際金融中心嘅區內主要競爭對手，新加坡有與東盟國家緊密貿易關係優勢，香港就毗連內地，不過彭博昨日引用國際貨幣基金組織（IMF）嘅估計，喺坡元升值帶動下，今年新加坡嘅GDP料將超越香港，即係400幾萬人嘅獅城，經濟總量仲大過700萬人嘅香港。

其實香港GDP兩年前已經被上海追過，今年有可能被人口少一大截嘅新加坡超越。IMF認為，經過通脹因素嘅調整，新加坡今年GDP可望達到2540億美元，而香港今年GDP可能只有2450億美元。新加坡去年GDP增幅高達14.7%，因此當地央行將坡元升值來壓抑通脹，過去一年坡元兌美元已經升值超過13%。

匯率此消彼長 令港經濟細過星洲

美銀美林駐新加坡經濟學家Chua Hak Bin仲話，相對新加坡及其他亞洲國家，香港經濟正在萎縮，加上美元疲弱，令到實行美元聯繫匯率制的香港經濟表現遜色。加上新加坡對博彩業及生物製藥行業提供優惠政策，又下調企業所得稅，都有助新加坡繼續保持經濟優勢。

以人均GDP比較嘅話，香港更加係多年前已落後獅城，澳門都喺兩、三年前追過香港，家連GDP總量都被新加坡超前，香港要同上海及新加坡爭，真係要加把勁振作不可。

前陣子，新加坡開腔希望發展成為人民幣離岸中心，雖然中國未有正式回應，但按照其人民幣國際化的進程，於貿易愈來愈密切的東盟諸國中建立一個人民幣離岸中心是勢所難免的。家香港唯一佔優嘅係早已開始人民幣貿易結算等金融服務，與內地的貿易額亦比新加坡高，中央都明確香港作為人民幣離岸中心嘅地位，然而如果香港經濟實力進一步被新加坡超前，人民幣離岸中心地位嘅重要性隨時也可能被取代。

報料電郵﹕piano@mingpao.com