許家印：歡迎做空 反對造謠

【明報專訊】噚日收市之後，小琴去咗恒大地產（3333）的月度業績會。見過許主席N次，就數噚日最風騷。佢全程有講有笑，仲教埋記者寫稿，CFO答問題，他都打斷，「你講呢的我都已經講晒啦。」

個人會否增持 要先問過老婆

唔知係咪因為噚日恒大股價盤中創出新高，小琴提第一條問題時，許家印就已經好high： 「我要澄清，我是歡迎對冲基金做空的，因為做空可以活躍股票，我只是反對邊造謠邊做空。點解我今次要公布公司有手頭現金332億，就是要闢謠，恒大無資金問題，亦不會發可換股債。至於回購股票，我要講，如果再有人造謠做空，恒大就有可能回購，但是，亦都有可能不回購。記者們要記住呢兩句一起寫啊！」再追問個人會否增持，他就好蠱惑咁答：「返屋企問吓老婆先知。」

等到有記者問及恒大樓盤均價升一成，佢又糾正道：「不是升一成，是原先讓利特大，我們是民生地產，別把我寫偏了。」當內地記者問及人民幣升值對公司債務的影響時，記者會進入高潮。許家印正色道：「你是在提醒我，恒大年初發人民幣債券的決定是多麼地超前和英明嗎？當初發債是一個願打一個願捱，現在不升值，也不關我們的事。」

最後一個關於保障房嘅老問題，high到爆嘅許家印卻馬失前蹄。他講到，恒大不適宜做保障房，並非不盡社會責任，恒大是全中國最有社會責任的企業之一，做足球就是盡責任。不適宜做保障房的原因，是恒大的材料都是國內外知名品牌，放棄呢啲供應商，專登搵保障房檔次的材料將成為難題。小琴記得綠城（3900）宋衛平曾拍住胸脯講，佢做嘅保障房材質同旗下商品房一模一樣。如果屬實，恒大是不是可以考慮加入呢？

報料電郵﹕[email protected]