金山復牌 財務總監即沽

【明報專訊】內地網絡巨企騰訊控股（0700）上周三入股金山軟件（3888）之後，金山首席財務總監王東暉就喺周四沽貨，唔通對公司冇乜信心？

懶理投行唱好 高位沽貨

據港交所嘅權益披露，王東暉喺上星期四，即係復牌之後，以平均每股5.698元，沽出184萬股，足足套現成1048萬元。金山喺復牌之後，股價一度「爆升」近兩成，至5.95元。之後，更加有投行唱好金山股價隨時衝到上6元。不過，王東暉就冇考慮咁多，索性把握到喺呢個高位附近沽貨。而金山軟件喺之後幾個交易日都一直回吐，噚日更加跌成4%至5.08元，可見王東暉呢次沽貨嘅決定確實幾明智喎！王東暉沽出嘅價位係5.698元，比金山前主席求伯君賣舊股畀騰訊嘅價錢每股5元，仲高得多。

睇翻王東暉今次沽完貨之後，仲持有公司100萬股股份，唔知王先生會唔會後悔當時唔沽埋呢？