胡潤：富無三代有道理

【明報專訊】創立「胡潤百富榜」嘅美國註冊會計師胡潤，之前就接受內地報章採訪，大談對中國富豪嘅印象，佢話「富不過三代」喺中國係非常有道理，因為生意只有0.1％機會可以留到去第4代。佢又大讚中國女人不得了，全球女首富三甲全部都係中國女人。

傳至第4代 機會千分一

胡潤話，「富不過三代」係個好聰明嘅觀點，因為喺中國，一個企業做到10年已經唔易，可以維持到第4代的可能性只有0.1％。至於「富不過三代」嘅原因，佢就話，隨着一個家族發展，子孫慢慢多，到第3代嘅時候，佢地手中各自持有啲股份，好難保證企業嘅核心價值；其次係有啲企業發展模式係第1代開創、第2代管理、第3代消費，所以到後來就算品牌還在，但都已經冇咗價值啦。

講起中國女企業家，胡潤就大讚「不得了」，因為全球女首富中，頭三位都係中國女人，分別係玖紙（2689）董事長張茵、龍湖地產（0960）董事長吳亞軍以及香港富華國際集團主席陳麗華。佢話中國女富豪不斷湧現，係由於中國職場上男女平等，同埋中國女人多數只生一個孩子，離開職場嘅時間唔會好長喎。不過講到最漂亮嘅中國富豪，佢就話係碧桂園（2007）太子女楊惠妍，但係可惜佢已經結咗婚。