恒大豪花2.25億 買巴西球員

【明報專訊】小琴並非球迷，亦未試過捧場中超聯賽。但搞作多多嘅恒大（3333）豪花2.25億元引入巴西聯賽最有價值球員孔卡，小琴就不可不理了。理由有二，一方面股東需要有交代，另一方面，小琴亦想探究恒大究竟係好大喜功定係精心部署。

首場比賽即入球

聽聞，孔卡前日首次上場僅20幾分鐘，便貢獻出在中國嘅「處男」入球。而佢嘅年薪700萬美金，創出中超紀錄，加上1000萬美金轉會費，佢同恒大三年半合約總共價值3450萬美元，合共2.25億元人民幣。喺廣州，恒大隊喺聯賽過半後仍保持不敗，每個主場至少有4.5萬名球迷觀戰。

最近一次見到許家印，再次追問足球投資。佢話，恒大係最有社會責任感嘅企業之一，投資足球係盡社會責任，今年會投資7億元。佢仲說服咗富力（2777）董事長李思廉打造富力球隊，一齊推進中國足球。

講到呢度，股東一定心驚，舊年恒大業績幾好，淨利70幾億元，為盡責一擲7億係咪太豪？但許家印隨即解釋，舊年投資足球2億元，並無虧損，反而盈利幾十萬。今年投入加碼，唔期望盈虧平衡，但會將虧損控制在千萬級，不可上億，而3年之內，一定會扭虧為盈。