鍾馨稼未認輸 300萬增持中聚

【明報專訊】小琴平時鍾意睇電視劇，而「超人愛股」中聚（0729）同主要股東兼前董事「科學狂人」鍾馨稼嘅恩怨情仇，劇情就十足十以前啲長篇連續劇咁，上星期一（11日）先畀中聚報警控告偽造文件，「㷫過火屎」嘅鍾博士，星期五（15日）就即刻用成300萬增持中聚股份，似乎係用行動同一班中聚管理層講，佢無咁易放手咁話喎！

中聚鍾博士鬥告對方

上星期咬牙切齒同小琴講到明「唔會咁容易罷休」嘅鍾博士，噚日就自動披露上個禮拜五增持中聚，睇返聯交所股權資料顯示，佢用咗每股0.62元增持500萬股中聚股份，即係用咗約莫310萬倒，似乎係話畀中聚管理層聽，無咁易撇得甩佢喎。

早排先由「中聚雷天」改名做「中聚電池」，中聚好明顯係想同有「雷天」做公司名嘅鍾博士劃清界線，不過呢對冤家始終都係欲斷難斷，先係中聚入稟告鍾博士違約，鍾博士上個月又響深圳入稟反告中聚違約，直到上星期一中聚又控告鍾博士響深圳法院遞交嘅文件涉嫌欺詐同偽造，小琴就覺得劇情好似以前啲長篇連續劇咁，一樣死唔斷氣囉。