馬雲借箭淡馬錫 買起雅虎第一步

【明報專訊】IT界近排真係新聞多多，蘋果教主喬布斯離世當然係頭等大事，不過其實亞洲呢邊都唔弱，事關網絡狂人馬雲講到明話想買起雅虎，最新發展仲話要搵埋新加坡主權基金幫手，似乎「追」唔到手唔罷休咁款！

回購股份後 伙美俄基金提全購

彭博通訊社噚日引述消息人士話，阿里巴巴（1688）母公司阿里巴巴集團，正同淡馬錫商量緊融資大計，等阿里巴巴可以向雅虎回購後者持有嘅阿里巴巴集團40%股權。簡單嚟講，即係搵淡馬錫借住錢，畀阿里巴巴回購股份。

報道又話，阿里巴巴完成回購呢一步後，就會聯同與俄羅斯互聯網投資基金Digital Sky Technologies，同埋美國私募基金Silver Lake合伙向雅虎提出全面收購。有分析員話，淡馬錫對於雅虎興趣唔大，相信應該係希望透過呢次機會，增持阿里巴巴。照咁睇，如果單刁成事嘅話，就真係一家便宜兩家着喇。