榮智健「無價」減持中信泰富

【明報專訊】08年金融海嘯「炒燶」外匯Accumulator後，中信泰富（0267）前主席榮智健，喺一曲「I kill you later」下黯然淡出。仲記得當年「爆煲」後，佢多次增持中信泰富，希望令小股東有番啲信心，但成效真係「麻麻」，佢之後亦開始鋪路「走人」。

2年半套現逾15億

港交所文件披露，今個禮拜二（11月15日），佢喺場外以現金交易，減持中信泰富1020萬股，但係無講賣幾多錢。小琴惟有粗略計一計，以當日收市價14.72元，榮智健一共套現1.5億元。今次減持相距上次，有成一年零八個月，而佢自從09年5月開始，已先後三次減持咗1.28億股份，每股作價介乎12.2元至19.627元，總共套現15.48億元，而個人持股量亦由11.53%，減至目前的7.73%。不過，近排市况唔多好，喺呢個位減持，唔通好等錢使？