廣船變飛船之謎

【明報專訊】呢排金魚缸悶到暈，噚日個市叫做旺番些少，都係得嗰500幾億成交。不過，隻廣州廣船（0317）噚日就做咗悶市奇葩，彈升最多14個巴仙，見6.23元，數番已經係09年1月以嚟最大升幅，收市都仲升到接近一成，報5.98元。

講真，家周圍都睇淡出年個環球經濟環境，出口貿易自然首當其衝，連帶造船呢一行都冇乜運行，咁點解廣船唔使做「沉船」之餘，噚日仲變咗「飛船」呢？有口痕友就話，中國第一艘航母噚日上晝出海試驗，係繼今年8月順利完成首次出海試驗後，再次起航揚我國威，所以啲造船股都一齊威威喎。不過講到威威，小琴只係諗起阿劉皇發議員今年幫香港人求嗰支籤「威人威威不是威」囉！

內地推進造船業合併

外國通訊社對於廣船變身飛船就另有一番見解。《彭博》通訊社引述《中國證券報》報道，中國工信部官員說「十二五」期間當局會推進造船企業兼併重組，爭取2015年有5家以上造船企業進入世界前10名，國內前10名造船企業總產量佔全國總產量比例上升至70%以上，唔怪得廣船即時變「飛船」啦。