香港護士：服務好過英國

【明報專訊】西方醫療水平一定比香港好？啱啱去完英國交流嘅護士話畀Emily知，其實香港啲護士好叻，公立醫院嘅服務水平比英國好！連當地同行聽完佢哋點服務病人都好佩服咁話。


英國分工細 香港跟到尾

北區醫院同伊利沙伯醫院兩個外科乳科資深護師陳頌詩同楊月明，上個月去咗英國諾丁咸大學嘅教學醫院（Royal Derby Hospital）交流。佢哋發現當地醫院分工好細，每個護理步驟都由唔同護士負責，但咁就搞到啲護士成日重重複複做同一樣嘢；相反，香港好唔同，護士由病人入院嗰一刻跟到出院，陳姑娘話﹕「其實香港護士好叻！成個flow（流程）、成個療程都要跟足晒，真真正正陪病人走過呢個病。」


不過，分工仔細都有好處，因為可以工多藝熟，好似點樣做乳房檢查都好有獨到心得，連香港啲醫生都無做得咁仔細，陳姑娘、楊姑娘都話獲益不淺。佢哋仲諗住將喺當地學到嘅檢查心得，出本小冊子畀市民參考。


醫管局每年都搞海外交流，今年第三年，共有115個來自11個唔同專科護士用公費去咗英國同美國成個月。