CY拉票拉埋泛民

【明報專訊】正所謂「拉得一票得一票」，喺特首選委會選舉似乎處於下風嘅梁振英，近日就向各界別選委廣發電郵，預祝佢哋當選，並藉此拉吓票。不過，最搞笑嘅係，連幾乎冇可能贏到、贏到都唔會支持CY嘅民主黨新星林立志，都收到呢個「溫馨電郵」。


今屆有幾個民主黨人挑戰勢畀建制派壟斷嘅區議會界別，預咗敗北，難怪林立志收到CY個電郵都打咗個突。佢話雖然自己冇可能當選，亦難以支持CY，但都欣賞佢嘅誠意，總好過唐公子乜都唔做喎。據聞，唐公子都有向選委候選人發短訊，但只係發畀建制派中人。


余若薇投票好頭暈

立法會同區議會選舉投票只係打個印咁簡單，但選委會就係另一回事。公民黨余若薇噚日就話，足足花咗5分幾鐘先完成投票程序，差啲搞到頭暈，事關法律界有成30席，佢劃完嗰30個格後，仲要檢查係咪真係剔咗無多無少30個名，以免選票作廢，「最慘係我有老花！」