新聞類別
財經
詳情#
【明報專訊】小琴前晚差啲激動到瞓唔着覺，皆因收到任務，有得去一睹阿Jay周杰倫真人。文化傳信（0343）噚日請咗周董來，發布佢哋嗰個聽落好犀利嘅「網上城市」ucan.com。
開開心心去到會展，點知一入門口，公關姐姐就話畀小琴知原來冇安排媒體訪問環節喔。哈？！個場擺咗幾十圍枱，坐晒啲正正經經嘅商界精英，睇怕都係阿Jay去過咁多大場面之中觀眾「最淡定」一次啦。小琴周圍啲行家都喊晒無聊，不過周董就不愧係周董，應對自如，當場在台上同觀眾拍檔表演紙牌魔術畀大家睇，順便仲笑吓個司儀中文唔掂，將普通話嘅「黑桃」譯作不知何物嘅「黑色階磚」。
話時話，文化傳信今次個ucan.com都好似頗有來頭，要整個社交網絡平台，全球首次嘗試搬成個城市上虛擬空間。講就講得好聽啦，不過凈係隔遠望咗望周董之外，小琴心入面就真喺頗為失望啦。
仲以為可以聽聽阿Jay由藝人變成商界猛人，講下佢嘅創業大計，點知佢除咗表演魔術之外，就完全冇嘢講。
小琴不嬲都好敬業，原本想捉住文化傳信老細問下近排啲營業虧損情况有冇好轉，最終都係冇機會。阿Jay唔單止做咗ucan.com嘅股東，個「網上城市」入面仲會有個「周杰倫藝術館」，好多藝人朋友會加盟。唉，下次唔通真係要喺個「網上城市」先可以再見到阿Jay？
email:piano@mingpao.com
回應 (0)
