平保抽水惹反彈

【明報專訊】自從08年千億大抽水功敗垂成後，平保喺內地愈來愈惹火，就好似平保前幾日公布將發行一批可換股債券集資260億人仔，靚仔總經理任匯川解畫時話，「暫無計劃在香港融資」。點知就係呢句話畀內地網民上綱上線，直斥為欺負內地股民，聲言「難道大陸的股民就比較好騙嗎？」


平保一講融資 A股必跌

皆因上次千億抽水機一響，內地A股即刻應聲急瀉，搞到A股家都有個媲美丁蟹之平保效應，即係但凡平保出來講融資，投資者就雞飛狗走。所以當前幾日平保公布，將在內地發行可換股債後，A股又再跌過，股民當然唔放過姓賴本色，對平保罵得就罵。最弊傢伙係，老總任匯川講到明話，「本次再融資選擇A股是因為H股操作有難度」，就惹來強勁反彈，話平保係咪因為在香港抽水不成，所以要走返內地呃錢。查實小琴覺得，金融市場最重要功能就係融資，唔通真係咩都唔畀做，個市只升不跌先滿意乎？