中銀人壽坐枱月曆 「龍」重其事

【明報專訊】仲有幾日就係2012年，小琴喺呢啲時候例必收到唔少公司送出嘅坐枱月曆，話晒會擺喺枱頭整整一年，冇番咁上下精美嘅話都唔會用。不過，唔知係咪大家對出年經濟前景未敢樂觀，今年啲坐枱月曆設計普遍較為平實，有啲行仲沿用番2011年嗰款，直至小琴噚日見到中國銀行個月曆，先可以話眼前一亮。


出年係龍年，中銀個2012年坐枱月曆都係以龍為主題，每個月份都有龍嘅圖案，打頭陣嘅1月份，主題叫「龍舞昇平」，有一男一女伴住一條相當生猛嘅龍，小琴就覺得「與龍共舞」仲貼切。咁多個月份，最特別要數龍舟月即係6月，有兩條半立體嘅龍舟，相當應節。


龍作為中國人嘅圖騰，中國銀行又作為中國人嘅銀行，喺龍年「龍」重其事咁整靚個坐枱月曆，都相當合理。不過，原來小琴手上個月曆係特別版，佢哋一般派出街嘅月曆，圖案一樣，但係就冇立體效果，但都依然好精美嘅。